Dr. Anila Sulstarova është formuar si profesioniste në Fakultetin e Shkencave Sociale, në të cilin ka kryer studimet Bachelor, Master dhe doktoraturë. Gardën Doktore e Shkencave e ka marrë në vitin 2011 me tezën: “Maksimalizimi i funksioneve të hemisferës së djathtë të trurit, përmes ndërhyrjes diadike, tek foshnjat 0-10 muajshe në institucionet rezidenciale”. Anila Sulstarova është pedagoge në departamentin Pedagogjisë dhe Psikologjisë prej vitit 2005. Është titullare e disa lëndëve si “Terapi Familjare; Terapi Arti dhe loje; Patologjitë e Atashimit.” Interesi akademik për kërkime shkencore është në: atashim; vetërregullim emocional; faji dhe turpi; vizatimet e fëmijëve; ëndrrat; ankthi; varësitë. Dr Anila Sulstarova është psikologe klinike prej vitit 2001. Çrregullimet që ajo trajton janë: ankthi tek fëmijët dhe të rriturit; fobitë e ndryshme tek fëmijët dhe adoleshentët; ataku i panikut tek fëmijët, adoleshentët dhe të rriturit; patologjitë e atashimit; trajtimin e personave me çrregullim të personalitetit shmangës; borderline; histrionik dhe të varur. Gjithashtu ofron terapi në çift dhe familjare. Dr. Anila Sulstarova ka qenë pjesë e ndërtimit të disa strategjive kombëtare në fushën e shërbimeve sociale.
Ornela është psikologe e licensuar nga Urdhri i Psikologut në Shqipëri. Është diplomuar në vitin 2007 si Psikologe Klinike në nivel Masteri, nga Universiteti i Shkencave Sociale, Tiranë. Është e licensuar edhe si supervizore e praktikave klinike për praktikat profesionale. Kualifikimet dhe certifikimet e saj ndër vite prekin sferën e çrregullimeve të ankthit, depresionit, traumës dhe post-traumës, abuzimit seksual, dhunës në familje, zisë së komplikuar dhe varësive nga substancat. Ornela ka punuar për më shumë se 14 vjet me adoleshentë dhe të rritur, në seanca individuale, dhe në grup, duke trajtuar çështje psikologjike të ndryshme të një game të gjerë problematikash dhe çrregullimesh. Zgjedhjen e teknikave terapeutike e bazon në një gamë të gjerë terapish dhe teknikash bazuar në fushën e kompetencës dhe të ekspertizës. Përqasjet terapeutike janë të fushës Cognitive Behavioral Therapy (CBT), Mindfulness, Terapi Emocionale Motivacionale , fokus në zgjidhjen e problemit, Dialectical Behavior Therapy (DBT) dhe ACT Therapy. Motoja e saj është: “Njerëzit fillojnë të shërohen kur e ndiejnë se po i dëgjon dikush”.
Z. Florian Kulla është psikolog fëmijësh i specializuar në punën terapeutike me fëmijët dhe prindërit. Z. Kulla është diplomuar si psikolog klinik në vitin 2003. Studimet e tij të doktoraturës janë fokusuar tek fëmijët me çrregullime të zhvillimit. Ai ka punuar si psikolog pranë Bashkisë së Tiranës (Qendra e Zhvillimit) për një periudhë dhjetë vjeçare, si specialist në ekipet e ndërhyrjes së hershme. Ai ka ndjekur një numër të madh trajnimesh ndërkombëtare në fushën e këshillimit dhe psikoterapisë me fëmijët dhe adoleshentët. Z.Kulla është i certifikuar si psikoterapist nga Shoqata Europiane për Psikoterapi. Ai është psikodramatist i certifikuar nga Instituti i Psikodramës (Beograd). Aktualisht ai është drejtues i Shoqatës Shqiptare për Psikodramë. Prej disa vitesh ai punon si psikoterapist me fëmijët, të rinjtë dhe të rriturit individualisht dhe në grupe.
Gresa Sulstarova është formuar si profesioniste në fushën e psikologjisë klinike, duke përfunduar studimet Bachelor dhe Master Shkencor në Fakultetin e Shkencave Sociale. Ajo është specializuar në terapi psikoanalitike dhe ka një përvojë të gjerë në fushën e shërbimeve sociale. Gjatë karrierës së saj, ka punuar në organizata joqeveritare, duke u angazhuar në mbrojtjen e fëmijëve dhe çështje të tjera sociale. Prej vitit 2018, Gresa Sulstarova ushtron praktikën e saj private si psikoterapiste psikoanalitike, duke ofruar trajtim për individë që përballen me çështje të shëndetit mendor. Ajo fokusohet në fusha si ankthi, depresioni, vështirësitë në marrëdhënie, dinamikat e pavetëdijshme dhe proceset e brendshme psikologjike. Në qasjen e saj terapeutike, ajo thekson rëndësinë e eksplorimit të përvojave të hershme, modeleve të lidhjes emocionale dhe ndërgjegjësimit të brendshëm si mjete për rritjen dhe shërimin personal.
Dhurata Nixha është psikologe këshillimi dhe psikoterapiste. Studimet post diplomike i ka kryer pranë “The University of Sheffield”, si dhe specializimin për Psikoterapi Pozitive dhe Familjare pranë Wiesbaden Academy of Psychotherapy. Dhurata është pedagoge pranë Fakultetit të Shkencave Sociale, Universiteti i Tiranës. Ka një përvojë shumë vjeçare në projekte të ndryshme me fokus mbështetjen psiko-sociale të grupeve vulnerable në organizata të ndryshme si: “Children for Tomorrow”; Labyrinth”; “Save the Children”, etj. Ka qenë e angazhuar ndër vite në platformën online “Nukjevet.net” për ofrimin e mbështetjes psikologjike dhe promovimin e shëndetit mendor në mesin e të rinjve. Fushat e interesit janë promovimi i shëndetit mendor dhe mirëqenies personale, është promovimi i mirëqenies në çift dhe familje dhe mbështetja e tyre në eksplorimin e vetes dhe zbulimin e potencialeve të tyre të plotë. Puna e saj klinike konsiston kryesisht në trajtimin e çrregullime të ankthit, çrregullimeve emocionale, të humorit si dhe stresit post-traumatik. Ajo ka një përvojë shumë vjeçare në mbështetjen psiko-sociale të të rinjve dhe familjeve të cilët ballafaqohen me situata të vështira përgjatë cikleve të ndryshme jetësore.
